ازاي الاحلام ممكن تضيع وازاي نقدر نقوم تاني ونخليها اسلوب حياة ؟

ماسألتش نفسك ليه الاحلام بتضيع .... اكيد مش هتقنع نفسك ان السبب انها صعب تتحقق على اساس انك قادر تجيب اخرك وفعلا بتعمل ده وطلع مش كفاية

او ان بسبب الدولة الي انت عايش فيها كأن عمر ما حد نجح فيها قبل كدا في اي مجال ؟

السبب الاساسي بيكون نفسي ومش زي ما جه في بالك ان المشكلة في قدراتك ... المشكلة لما بتقلل منها او تنساها او تستسلم للاهمال

اكيد عارفين الاحساس ده ، حتى لو ماكانش دايماً عندك حلم واضح بس اكيد في حاجة عشتها وقربت لده شوية او مهارة معينة حسيت انها بتميزك المشكلة ان غالبا ماستغلتهاش للاخر او سيبتها تضيع

عارفين فكرة الحاجة الي بتبدأ فيها وانت متحمس ومش علي بعضك وعينك فيها نور وبهجة طفل صغير والوقت يسرقك يعدي 3 ، 5 ، 7 ساعات وانت مش حاسس بالوقت تخلصها وانت حاسس بكمية دوبامين وادرينالين هيفجروا نفوخك من كتر حماسك وفخرك واحساسك بانك عملت إنجاز ، تهرب من كل حاجة ومن كل حد بيها واي حاجة تانية تسيبها تعدي زي ماتعدي لغاية ماترجع تقابل الحاجة الي بتحسسك بذاتك الحقيقة الي بتعرفك انت مين وعايش ليه وعايز ايه ، تيجي علي بالك اول ما حد يسألك عن نفسك وتبدأ تعرف نفسك بيها اول حاجة كأنك عايش عشانها تتشاف غريب ساعات ، وتتشاف مميز ساعات بس دايما كنت بتكمل عشانها ، عشان تحس نفس الإحساس الي بتصحى عشانه كل يوم ، الشغف وان ليك قيمة وانك راضي عن نفسك

لغاية ما الوقت يعدي وتحس ان في حاجة اتغيرت ، تحس ان النور ، الشعلة الشغف الشئ كان بيحركك اختفى اتدفن ، اتدفن في حتة بعيدة جواك ومش قادر توصله ابداً حفرة عميقة اعمق من نواة الأرض وفوقها غيوم كثيفة

من غير النور الي كان جواك بتبدأ تحس بالضلمة وهوا سائع مع سكوت مخييف وفراغ ، فراغ بيبلعك حرفياً كل جزء فيك لغاية ما تحس ان مافيش حاجة ليها معنى ، انت حرفياً مش شايف حاجة

الشعلة الي جواك كانت بتسلط الضوء علي حاجة واحدة والحاجة دي كانت مدية لحياتك معنى ، حاجة أي حاجة غيرها كانت بتعدي وبتعدي بثقة عشان انت عارف اول ما هتخلصها هتقدر تعمل الحاجة الي بتحبها ، محور حياتك هدف بتعيش عشانه وبتستحمل عشانه وبتهرب بيه من كل حاجة تزعلك او تأذيك او تحسسك إنك أقل وأنك مش كفاية وأنك مش راضي عن نفسك ، شعور مختلف مافيش حاجة تانية ممكن تعوضه مهما كانت الناس شايفاها ليها معنى عشان أي متعة تانية لحظية ، لكن دي كانت بتدوم معاك وبتدي معني لكل لحظة بتعيشها وده وبكل بساطة لغاية ما تبدأ تهرب منها زي أي حاجة تانية بدل ماكنت بتهرب ليها ، لغاية ما تبدأ تحس انها متعبة زي أي حاجة تانية رغم انها كانت بالنسبة لك كل الراحة ، كانت الاستثناء الوحيد الي بين حاجات كتير انت مش بتحبها في نفسك ، ويبدأ يعدى كل يوم بتقل من غير ما تكون في حاجة بتصبرك عشان ماباقاش في حاجة ليها معنى

الشعلة مش بتكون اتطفت عشان ده مستحيل ، اشبه بعقد ابدي مربوط بروحك ، لو اتطفت يعني مافيش امل ، بس ازاي ودايماً بيكون في امل ، هي بس ادفنت ، بتكون انت بعدت عنها لدرجة كفاية انك تعمل مسافة كبيرة بينك وبينها تتملي بمشاعر سلبية وألم وكره لذاتك ، تتدفن تحته بعمق وبمعق لمسافات ومسافات ماتقدرش تحفرها الا بعزيمة قوية وعقل من دهب عشان تقدر ترجع توصل تاني لذاتك الحقيقة رغم ان الموضوع بيكون اصعب وغيوم اليأس والاستسلام بيطوفوا حواليك وكل مسافة تحفرها تتردم اكتر وتحفر وتتردم اكتر وتحفر وتتردم اكتر لغاية ما المسافة تكبر وتكبر وتكبر حتى عن الأول ، وتستسلم ويعدي وقت كبير أيام ، أسابيع شهور سنين ، وترجع تحفر حاجة بسيطة او حتى كتير كتير اوي لغاية ما غيوم اليأس والالم والاستسلام يطوفوا حواليك تاني بطريقة ماتقدرش تستحملها ومع صعوبة الحفر بترجع خطوات لورا اكتر واكتر والحفرة تتردم اكتر واكتر وتستسلم وتعدي تاني أيام واسابيع وشهور وسنين وتحس ان عمرك بيضيع وتتمنى أنك ماكونتش بعدت من الأول بحجة ان في حاجات اهم وانك بتنضج وبتفهم الدنيا بس ايه المهم في انك تفهم الدنيا والحاجة الي انت بتعيش عشانها في الدنيا مابقتش موجودة ، تتمني ترجعلك تاني حماسة الطفل الصغير الي فرحان بنفسه وهو بيعمل حاجة عارف انها مخلياه شخص مميز وقادر يحب نفسه عشانها بس دلوقت مالكش غير الفراغ والكره والالم

طب ايه الحل ؟

ببساطة ماتخليش وقت اكتر يعدي الا وانت بتحاول على الاقل تكتشف نفسك ، ممكن يكون حلمك كل ده كان مجرد بداية لحلم جديد وانت مافهمتش لما الموضوع اتغير

ممكن اصلا ما تكونش حددت حلم معين بس عارف انه موجود جواك ومهارتك بتبدأ تظهر بشكل عام

في ناس مش محظوظة كفاية انها تفهم سبب وجودها في الحياة او ايه الي ممكن يقدروا يسموه حلم بدري وفي عرفوا بس ما قدروش يتطوروا معاه عشان مش دايما بيفضل على شكله الاولي الي بيكون في بالك وانت صغير كل ما تفهم اكتر كل ما الموضوع بيوضح اكتر

على الاقل ممكن من اهمالك الي فات كله تحمد ربنا انك ماكملتش في حاجة هتحتاج تغيرها او تغير فيها وتقدر تبدأ على طول في المسار بعد ما طورته بخبرتك الي فاتت والوقت الي اهملت فيه بس فكرت شوية اكتر المفروض يكون عامل ازاي وتبدأ المرة دي صح

كل الي محتاج تعمله تتخيل افضل نسخة ممكنة من نفسك هتكون عاملة ازاي وبتعمل اي في يومها وايه قدرت تتغلب عليه وده ببساطة الي تمشي عليه مع كل الحاجات الي اتعلمتها الي ممكن تخلقلك بدل الحلم 10 وكلهم قريبين من بعض وكلهم تقدر تحققهم

عود نفسك بس على احساس الانتاجية وانت هتنبهر من وسع احلامك واختياراتك الكتير وانجازاتك الاكبر بحيث كل ما حلمك يحصله حاجة تكون دايماً قادر وبمرونة تخلي التغيير الي حصل في صالحك من ناحية دراستك ، اهمالك ، توقعاتك لنتيجة حاجة معينة عملتها وخيبت املك او اهمال فجأة لكل حاجة

المهم اوعى ترجع تاني لمنطقة الراحة هي عادي اصلا جزء من كل يوم ... بس ماينفعش تكون هي كل يوم ... ماينفعش تكون حياتك

اول ما تعدي الحتة دي مش بس هتوصل لحلم ماتوقعتش تقدر توصله ، هتوصل لحلم ماتوقعتش تقدر تحلمه بعقليتك السابقة

وحتى لو ماقدرتش تحققه ، مش الفكرة في انك تحققه عشان كدا كدا حياتك مش بتنتهي مع الحلم لسة

المفروض يكون اسلوب حياة هتستمر عليه طول ما حياتك مستمرة وده بالظبط الي هيفاجأك وهيخليك اقوى من الي حواليك الي ببساطة اول ما تحصل حاجة يوقفوا

عشان ازاي هتوقف وده اسلوب حياتك كدا كدا مش هتوقف وانت بتعمل الشئ الي قررت تعيش عشانه انت بس قررت تكون الشخص ده ، شخص منتج عنده دايما اهداف واضحة قريبة المدى وبعيدة المدى ، عارف معنى السعادة الحقيقية وعنده هوايات كتير انتاجية ممتعة ومش بينخدع بالمتع اللحظية وبيقدر الابداع والفن الحقيقي

كل جانب من حياتك هيكون بيعبر عن حاجة فيك مش هتنتهي بغلطة او فشل عشان دي حياتك ولسة ما انتهتش ، الفشل الوحيد هو الاستسلام

هتعيش حياتك ازاي وانت قررت بس تعيش لغاية ما تموت .. مش بالظبط شبه الانسحاب منها ؟

طول ما انت مكمل في اسلوب حياتك المنتج الي اختارته هتحقق احلامك ومش بس الي بتتكلم عنه على طول لا اكتر منه وفي كل جوانب حياتك

ربنا ماخلقناش عشان نعيش بس نستنى الموت مش كدا ؟

الحلم مش دايما بالصورة النمطية الي في دماغك والي بيقتل المتعة لا ، عندك حلم يعني بادئ اصلا من حاجة من جواك فعلا بتحب تعملها ونفسك تعملها كل يوم وتقدمها للعالم كله بفخر

مش حلم حد فارضه عليك ، فكر كويس واول ما تحسه خلاص بطل تفكير مهما كان !!!!!

وطول ما انت فعلا مكمل انسى الاهمال وان حياتك تسرقك وتبعدك عنه تاني عشان بكل بساطة هيكون هو حياتك

رسالة اتخلقنا عشان نحققها ونموت في سلام وربنا راضي عننا 🤍